ନୂଆଦିଲ୍ଲୀ,୧୫/୦୧/୨୦୨୦ ; ରାଇସିନା ଆଲୋଚନାରେ ଅଂଶଗ୍ରହଣ କରିବା ଲାଗି ଭାରତ ଗସ୍ତରେ ଥିବା ରୁଷର ବିଦେଶ ମନ୍ତ୍ରୀ ମିଃ ସର୍ଗେ ଲାଭରୋଭ ଆଜି ନୂଆଦିଲ୍ଲୀଠାରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି । ବିଦେଶ ମନ୍ତ୍ରୀ ଲାଭରୋଭ ଏହି ଅବସରରେ ପ୍ରଧାନମନ୍ତ୍ରୀଙ୍କୁ ରୁଷ ରାଷ୍ଟ୍ରପତି ମହାମହିମ ମିଃ ଭ୍ଲାଦିମିର ପୁତିନଙ୍କ ଶୁଭକାମନା ଜଣାଇଥିଲେ । ପ୍ରଧାନମନ୍ତ୍ରୀ ଏହି ଶୁଭକାମନାକୁ ସାଦରେ ଗ୍ରହଣ କରିବା ସହିତ ନୂଆବର୍ଷରେ ରୁଷବାସୀଙ୍କ ପାଇଁ ଶାନ୍ତି ଓ ସମୃଦ୍ଧି କାମନା କରିଥିଲେ । ପ୍ରଧାନମନ୍ତ୍ରୀ ୧୩ ଜାନୁଆରୀ, ୨୦୨୦ରେ ରାଷ୍ଟ୍ରପତି ପୁତିନଙ୍କ ସହିତ ହୋଇଥିବା ବିସ୍ତୃତ ଆଲୋଚନା ସମ୍ପର୍କରେ ଉଲ୍ଲେଖ କରିବା ସହିତ ଦୁଇ ଦେଶ ମଧ୍ୟରେ ରହିଥିବା ସ୍ୱତନ୍ତ୍ର ତଥା ସହଯୋଗୀ ରଣନୈତିକ ଭାଗିଦାରୀରେ ଗତବର୍ଷ ହୋଇଥିବା ଅଗ୍ରଗତି ବିଷୟରେ ଆଲୋକପାତ କରିଥିଲେ ।
ଚଳିତ ବର୍ଷ ମେ’ ମାସରେ ରୁଷରେ ହେବାକୁ ଥିବା ଭିକ୍ଟରୀ ଡେ’ର ୭୫ତମ ବାର୍ଷିକୀ ସମାରୋହ ଏବଂ ଜୁଲାଇରେ ହେବାକୁ ଥିବା ବ୍ରିକ୍ସ ଓ ଏସସିଓ ଶିଖର ସମ୍ମିଳନୀ ପାଇଁ ପ୍ରଧାନମନ୍ତ୍ରୀଙ୍କ ରୁଷ ଗସ୍ତକୁ ରାଷ୍ଟ୍ରପତି ପୁତିନ ଆଗ୍ରହର ସହ ଅପେକ୍ଷା କରିଥିବା ବିଦେଶ ମନ୍ତ୍ରୀ ଲାଭରୋଭ ପ୍ରକାଶ କରିଥିଲେ । ଚଳିତ ବର୍ଷ ରାଷ୍ଟ୍ରପତି ପୁତିନଙ୍କ ସହିତ ଏକାଧିକବାର ସାକ୍ଷାତକୁ ପ୍ରଧାନମନ୍ତ୍ରୀ ସ୍ୱାଗତ କରିବା ସହିତ ଚଳିତ ବର୍ଷ ଶେଷଭାଗରେ ରାଷ୍ଟ୍ରପତି ପୁତିନଙ୍କ ଭାରତ ଗସ୍ତକୁ ଆଗ୍ରହର ସହ ଅପେକ୍ଷା କରିଥିବା କହିଥିଲେ । ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ୨୦୧୯ରେ ଦୁଇ ଦେଶ ବିଭିନ୍ନ ଗୁରୁତ୍ୱପୂର୍ଣ୍ଣ ନିର୍ଣ୍ଣୟ ଏବଂ ପରିଣାମରେ ଉପନୀତ ହୋଇଛନ୍ତି । ସେ ପରାମର୍ଶ ଦେଇଥିଲେ ଯେ ୨୦୨୦ ବର୍ଷ ଭାରତ ଏବଂ ରୁଷ ମଧ୍ୟରେ ରଣନୈତିକ ଭାଗିଦାରୀର ବିଂଶତମ ବର୍ଷ ହୋଇଥିବାରୁ ଏହା ସମସ୍ତ ନିଷ୍ପତ୍ତି କାର୍ୟ୍ୟକାରୀ କରିବାର ବର୍ଷ ହେବ । ଗୁରୁତ୍ୱପୂର୍ଣ୍ଣ ଅନ୍ତର୍ଜାତୀୟ ଏବଂ କ୍ଷେତ୍ରୀୟ ପ୍ରସଙ୍ଗରେ ରୁଷର ସ୍ଥିତି ସମ୍ପର୍କରେ ବିଦେଶ ମନ୍ତ୍ରୀ ଲାଭରୋଭ ପ୍ରଧାନମନ୍ତ୍ରୀଙ୍କୁ ଅବଗତ କରାଇଥିଲେ ।
(ସ୍ରୋତ-ପିଆବି)