ବ୍ରହ୍ମପୁର(ଜିଲ୍ଲା ଖବର) : ୫୭ତମ ନ୍ୟାସନାଲ ରୋଲର ସ୍କେଟିଂ ଚମ୍ପିଆନସିପ୍ ଚଳିତ ମାସ ୧୫ ତାରିଖରୁ ୨୪ ତାରିଖ ପର୍ଯ୍ୟନ୍ତ ବିଶାଖାପାଟଣାଠାରେ ରୋଲର ସ୍କେଟିଂ ଫେଡେରସନ ଅଫ୍ ଇଣ୍ଡିଆ ପକ୍ଷରୁ ଅନୁଷ୍ଠିତ ହେବ । ଏହି ଚମ୍ପିଆନସିପରେ ଭାଗ ନେବା ପାଇଁ ଓଡ଼ିଶା ରୋଲର ସ୍କେଟିଂ ଫେଡେରେସନ ପକ୍ଷରୁ ଓଡ଼ିଶାରୁ ବିଭିନ୍ନ ବର୍ଗ ଓ ରୋଲର ହକିରେ ୧୩୮ଜଣ ସ୍କେଟରଙ୍କୁ ଚୟନ କରାଯାଇଛି । ଏହି ଟିମରେ ସାମିଲ ହୋଇଛନ୍ତି ବ୍ରହ୍ମପୁର ସହରର କମାପଲ୍ଲୀସ୍ଥିତ ସିଲକି ରୋଲର ସ୍କେଟିଂ ଏକାଡେମୀର ଉଭୟ ବାଳିକା ଓ ବାଳକ ବିଭାଗର ବିଭିନ୍ନ ବର୍ଗରେ ୭ଜଣ ସ୍କେଟର । ୭ବର୍ଷରୁ ୯ ବର୍ଷ ବର୍ଗରେ ଅନ୍ୱେଷା ବିଷୋୟୀ, ଆୟୁଷ ପଣ୍ଡା, ୯ବର୍ଷରୁ ୧୧ ବର୍ଷ ବର୍ଗରେ ଆଶୁତୋଷ ପାଢୀ, ପୁନିତ ଗୌଡ଼, ୧୧ବର୍ଷରୁ ୧୪ ବର୍ଷ ବର୍ଗରେ ଶ୍ରଦ୍ଧା ପ୍ରିୟଦର୍ଶନୀ, ଆଶ୍ରୀର୍ବାଦ ପାଢୀ ଓ ୧୪ରୁ ୧୬ ବର୍ଗରେ ଅନୁଭବ ପଣ୍ଡା ଓଡ଼ିଶା ଟିମ୍ ରେ ସାମିଲ ହୋଇଛନ୍ତି । ଏହି ଜାତୀୟ ସ୍ତରୀୟ ପ୍ରତିଯୋଗୀତାରେ ଦେଶର ବିଭିନ୍ନ ପ୍ରାନ୍ତରୁ ସ୍କେଟର ମାନେ ଅଂଶ ଗ୍ରହଣ କରିବାକୁ ଥିବା ବେଳେ ଜୁନିଅର ସ୍କେଟର ମାନଙ୍କ ୧୫ ତାରିଖରୁ ୧୭ତାରିଖ ଓ ସିନିଅର ସ୍କେଟର ମାନଙ୍କ ୧୮ତାରିଖରୁ ୨୪ ତାରିଖରେ ପ୍ରତିଯୋଗୀତା ଅନୁଷ୍ଠିତ ହେବ । ଏଥିପାଇଁ ସିଲକି ରୋଲର ସ୍କେଟିଂ ଏକାଡେମୀ ପକ୍ଷରୁ ଭାଗ ନେବାକୁ ଥିବା ସମସ୍ତ ସ୍କେଟର ସ୍ଥାନୀୟ କୋଚ୍ ଗୌତମଙ୍କଠାରୁ ଉତ୍ତମ ପ୍ରଶିକ୍ଷଣ ପାଇଥିବା ବେଳେ ଯୋରଦାର ଅଭ୍ୟାସ ମଧ୍ୟ କରିଛନ୍ତି । ଆଜି ଏହି ଚମ୍ପିଆନସିପରେ ଅଂଶ ଗ୍ରହଣ କରିବା ଲାଗି ବ୍ରହ୍ମପୁରର ସ୍କେଟର ମାନେ ବିଶାଖାପାଟଣା ଅଭିମୁଖେ ଆଜି ଯାତ୍ରା ଆରମ୍ଭ କରିଛନ୍ତି । ଏଥି ପୂର୍ବରୁ ସମସ୍ତ ପ୍ରତିଯୋଗୀଙ୍କୁ ଏକାଡେମୀ , ଅଭିଭାବକ, ସ୍କେଟର ମାନେ ଉତ୍ତମ ପ୍ରଦର୍ଶନ ଓ ସଫଳତା ପାଇଁ ଶୁଭେଚ୍ଛା ଜଣାଇଛନ୍ତି । ସୂଚନା ଯୋଗ୍ୟ ଯେ ଜାତୀୟ ଚମ୍ପିଆନସିପରେ ଭାଗ ନେବା ପାଇଁ ଏହି ସ୍କେଟର ମାନେ ପୂର୍ବରୁ ବ୍ରହ୍ମପୁର ଉପକଣ୍ଠ ଗାନ୍ଧୀ କଲେଜ ଅଫ୍ ଇଞ୍ଜିନିୟରିଂ କଲେଜ ପରିସରରେ ଗତ ମାସ 3ତାରିଖରେ ଅନୁଷ୍ଠିତ ହୋଇଥିବା ରାଜ୍ୟ ସ୍ତରୀୟ ଚନୟ ଶିବିରରେ ଉତ୍ତମ ପ୍ରଦର୍ଶନ କରି ମନୋନୀତ ହୋଇଥିଲେ ।