ବରଗଡ,୦୮/୧୨/୨୧ (ଜିଲ୍ଲା ଖବର) : ଗାର୍ଲଫ୍ରେଣ୍ଡକୁ ମୋବାଇଲ ଗିଫ୍ଟ ଦେବାକୁ ଧାନ ଚୋରି କରୁଥିଲା ଯୁବକ । ରାତି ଅଧରେ ସମସ୍ତେ ଶୋଇଥିବା ଅବସ୍ଥାରେ ଧାନ ଚୋରି କରି ବାଇକରେ ବୋହି ନେଉଥିଲା । ହେଲେ ଦୁର୍ଭାଗ୍ୟ ବସତଃ ଗ୍ରାମବାସୀଙ୍କ ହାବୁଡରେ ପଡିଯାଇଥିଲା । ନିର୍ଦ୍ଧୁମ ମାଡ ଖାଇବା ସହ ଲୋକେ ତାକୁ ଖୁଣ୍ଟରେ ବାନ୍ଧି ଦେଇଥିଲେ ।
ପରେ ଘଟଣାସ୍ଥଳରେ ପୋଲିସ ପହଞ୍ଚି ଯୁବକଙ୍କୁ ଉଦ୍ଧାର କରି ଥାନାକୁ ନେଇଛି । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ବରଗଡ ଜିଲ୍ଲା ମେଲ୍ଟାମୁଣ୍ଡା ଥାନା ଅନ୍ତର୍ଗତ ଶନିମାଳ ଗାଁରେ ।
ସୂଚନା ମୁତାବକ କୁଚିପାଲି ଗ୍ରାମର ଗିରିଶ ଭୁଏ, ଶନିମାଳ ଗ୍ରାମର ବିହାରୀ ଭୁଏଙ୍କ ଘରୁ ରାତିରେ ଧାନ ବସ୍ତା ବାଇକରେ ଲଦି ନେଇଯାଉଥିଲେ । ସେହି ସମୟରେ ବିହାରୀ ଚୋରକୁ ଦେଖି ଚୋର ଚୋର କହି ଚିତ୍କାର କରିଥିଲା । ସେହି ସମୟରେ ସ୍ଥାନୀୟ ଯୁବକ ମାନେ ଚୋର କୁ କାବୁ କରି ନେଇଥିଲେ । ତାପରେ ପ୍ରବଳ ମାଡ ମାରିବା ସହ ଗାଁ ବିଜୁଳି ଖୁଣ୍ଟରେ ବାନ୍ଧିଥିଲେ ।
ଚୋରକୁ କାହିଁକି ଚୋରି କରୁଛୁ ପଚାରିବାରୁ ଗାର୍ଲଫ୍ରେଣ୍ଡକୁ ମୋବାଇଲ ଦେବା ପାଇଁ ଚୋରି କରିଛି ବୋଲି ସିଧାସଳଖ କହୁଛି । ପରେ ଘଟଣାସ୍ଥଳରେ ପୋଲିସ ପହଁଚି ଚୋରକୁ ଥାନାକୁ ନେଇଥିଲା । ଏହି ଘଟଣାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରଲ ହେଉଛି ।