ନୂଆଦିଲ୍ଲୀ,୦୪/୦୯/୨୧ (ଜିଲ୍ଲା ଖବର) : ସେପ୍ଟେମ୍ବର ଶେଷ ସପ୍ତାହରେ ଆମେରିକା ଗସ୍ତ କରି ପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ରାଷ୍ଟ୍ରପତି ଜୋ ବାଇଡେନ ଚଳିତ ବର୍ଷ କାର୍ଯ୍ୟଭାର ଗ୍ରହଣ କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହା ପ୍ରଥମ ଗସ୍ତ ହେବ।
ଜାତୀୟ ଗଣ ମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ ପ୍ରଧାନମନ୍ତ୍ରୀ ୱାଶିଂଟନ୍ ଡିସି ଏବଂ ନ୍ୟୁୟର୍କ ଗସ୍ତ କରିବେ । ଏହି ଗସ୍ତ ସେପ୍ଟେମ୍ବର ୨୨ ରୁ ୨୭ ମଧ୍ୟରେ ହେବ ବୋଲି ସୂଚନା ମିଳିଛି ।
ବାଇଡେନଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କ ପ୍ରଥମ ବ୍ୟକ୍ତିଗତ ବୈଠକ ହେବ । ଦୁଇ ନେତା ପ୍ରାୟତ ତିନୋଟି ଭିନ୍ନ ଭିନ୍ନ ସମୟରେ ଭିଡିଓ କନଫରେନ୍ସ ରେ ସାକ୍ଷାତ କରିଛନ୍ତି – ମାର୍ଚ୍ଚରେ କ୍ୱାଡ ଶିଖର ସମ୍ମିଳନୀ, ଏପ୍ରିଲରେ ଜଳବାୟୁ ପରିବର୍ତ୍ତନ ଶିଖର ସମ୍ମିଳନୀ ଏବଂ ଚଳିତ ବର୍ଷ ଜୁନ୍ ଜି -୭ ଶିଖର ସମ୍ମିଳନୀରେ ।
ଜି -୭ ଶିଖର ସମ୍ମିଳନୀ ପାଇଁ ପ୍ରଧାନମନ୍ତ୍ରୀ ମୋଦି ପୂର୍ବରୁ ବ୍ରିଟେନ ଗସ୍ତ କରିବାର ଥିଲା, ଯେଉଁଠାରେ ସେ ବାଇଡେନଙ୍କୁ ଭେଟିଥାନ୍ତେ, ସମଗ୍ର ଭାରତରେ କୋଭିଡ -୧୯ର ଦ୍ୱିତୀୟ ଲହର ଯୋଗୁଁ ଏହି ଯାତ୍ରା ବାତିଲ ହୋଇଯାଇଥିଲା।
ସେପ୍ଟେମ୍ବର ୨୦୧୯ ରେ କୋଭିଡ -୧୯ ମହାମାରୀ ପୂର୍ବରୁ ମୋଦି ଶେଷ ଥର ପାଇଁ ଆମେରିକା ଗସ୍ତ କରିଥିଲେ। ଯେତେବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହାଓଡି ମୋଦି ଇଭେଣ୍ଟକୁ ସମ୍ବୋଧିତ କରିଥିଲେ। ଆଫଗାନିସ୍ତାନରେ ତାଲିବାନ ସରକାର ଗଠନ ଚାଲିଥିବାବେଳେ ବାଇଡେନଙ୍କ ସହ ସାକ୍ଷାତ ଏକ ଗୁରୁତ୍ୱପୂର୍ଣ୍ଣ ସମୟରେ ହେଉଛି। ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତିଙ୍କ ବ୍ୟତୀତ ବାଇଡେନ ପ୍ରଶାସନର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିବେ ବୋଲି ଆଶା କରାଯାଉଛି।