ନୂଆଦିଲ୍ଲୀ, ୨୫/୦୫/୨୧ (ଜିଲ୍ଲା ଖବର) : କରୋନା ପ୍ରଭାବରେ ଏବେ ସାରା ଦେଶବାସୀ ହନ୍ତସନ୍ତ ହେଉଛନ୍ତି । ଅନେକ ଲୋକଙ୍କ ଘରସଂସାର ଓଜାଡି ଦେଲାଣୀ ମହାମାରୀ କରୋନା । ସାଧାରଣ ଲୋକଙ୍କ ଠାରୁ ଆରମ୍ଭ କରି ସେଲିବ୍ରେଟି ଯାଏଁ , ଅନେକ ଲୋକଙ୍କ ଆର୍ଥିକ ଅବସ୍ଥା ବିଗାଡି ଦେଇଛି କରୋନା । ଆର୍ଥିକ ଅନାଟନ ମଧ୍ୟରେ ଅନେକ ଗତି କରୁଛନ୍ତି । ନିକଟରେ ଅନେକ ସେଲିବ୍ରେଟି କରୋନା କାରଣରୁ କାମ ବନ୍ଦ ହେବା ଫଳରେ, ଅଭାବ ଅସୁବିଧାରେ ଦିନ କାଟୁଥିବା କଥା ସୋସିଆଲ ମିଡିଆ ମାଧ୍ୟମରେ ସୂଚନା ଦେଉଛନ୍ତି ।
ଠିକ୍ ସେମିତି ଏବେ ଜଣାଶୁଣା ସିଙ୍ଗର ସୋନା ମହାପାତ୍ର ସୋସିଆଲ ମିଡିଆ ମାଧ୍ୟମରେ ଏକ ପୋଷ୍ଟ ସେୟାର କରିଛନ୍ତି । ଯାହା ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ସେ କିଭଳି ଏ ପରିସ୍ଥିତିରେ ଆର୍ଥିକ ସଙ୍କଟ ମଧ୍ୟରେ ଦିନ କାଟୁଛନ୍ତି ସେ ବିଷୟରେ କହିଛନ୍ତି । ସୋନାଙ୍କ କହିବା ଅନୁଯାୟୀ, ତାଙ୍କର ସବୁ ସେଭିଙ୍ଗ୍ ଏକ ଫିଲ୍ମରେ ସରି ଯାଇଛି ଏବଂ ଏବେ କରୋନା କାରଣରୁ ଲାଗିଥିବା ଲକଡାଉନ କାରଣରୁ କାମ ମଧ୍ୟ ବନ୍ଦ ରହିଛି । ଏସବୁ ସମ୍ପର୍କରେ ସୋନା ଏକ ପୋଷ୍ଟ ମାଧ୍ୟମରେ କହିଛନ୍ତି ।
ସୋନା ମହାପାତ୍ର ଟ୍ବିଟ କରି ଏକ ପୋଷ୍ଟ ସେୟାର କରିଛନ୍ତି । ପୋଷ୍ଟରେ ସେ ତାଙ୍କର ଏକ ହସୁଥିବା ଫଟୋ ସେୟାର କରିଛନ୍ତି । ଏବଂ କ୍ୟାପସନରେ ଲେଖିଛନ୍ତି ଯେ, ‘ଯନ୍ତ୍ରଣାରେ ଦଉଡି ହେବ ନାହିଁ କିନ୍ତୁ , ତା ପାଇଁ ଚିନ୍ତାରେ ରହିହେବ । ଯେବେବି ନିଜକୁ ହସାଇ ପାରୁଛି , ହସାଉଛି । ଏହା ସହିତ ସେ ତାଙ୍କର ଆର୍ଥିକ ଅବସ୍ଥା ବିଷୟରେ ମଧ୍ୟ ଲେଖିଛନ୍ତି ଯେ, ‘ମୋର ଫିଲ୍ମ ‘ସଟ ଅପ୍ ସୋନା ‘ରେ ମୋର ସବୁ ସେଭିଙ୍ଗ୍ ସରି ଯାଇଛି । କରୋନା ମହାମାରୀର କିଛି ସମୟ ପୂର୍ବରୁ ମତେ ପରିସ୍ଥିତି ଏମିତି ଏକ ପରିସ୍ଥିତିରେ ଛିଡା କରି ଦେଇଛି ,ଯେଉଁଠି ଇନକମର ଏବେ କୌଣସି ରାସ୍ତା ନାହିଁ ।
ତାଙ୍କର ଟ୍ବିଟ ଏବେ ବେଶ ଭାଇରାଲ ହେବାରେ ଲାଗିଛି । ଅନେକ ତାଙ୍କ ପୋଷ୍ଟରେ ନିଜ ନିଜର ପ୍ରତିକ୍ରିୟା ପ୍ରକାଶ କରିବାରେ ଲାଗିଛନ୍ତି । ଏବଂ ତାଙ୍କୁ ଏଭଳି ପରିସ୍ଥିତିରେ ଧୈର୍ଯ୍ୟହରା ନହୋଇ ସାହାସ ଜୁଟାଇବାକୁ କହିଛନ୍ତି । ଜଣେ ୟୂଜର ଲେଖିଛନ୍ତି ଯେ, ଏହି ଖରାପ ସମୟ ଦିନେ ଚାଲିଯିବ । ମୁଁ ଆପଣଙ୍କ ପାଇଁ ପ୍ରାର୍ଥନା କରିବି । ଏହା ସହିତ କିଛି ୟୂଜର୍ସ ତାଙ୍କୁ ଫିଲ୍ମର ସଫଳତା ପାଇଁ ଶୁଭେଚ୍ଛା ଜଣାଇଛନ୍ତି ।