ବାଲେଶ୍ୱର, ୧୯/୦୩/୨୧ (ଜିଲ୍ଲା ଖବର) : ବାଲେଶ୍ୱର ସୋରରେ ସୁନା ବ୍ୟବସାୟୀଙ୍କୁ ଅପହରଣ ଅଭିଯୋଗ । ସୁନା ବ୍ୟବସାୟୀଙ୍କୁ ସୁନା କିଣିବାକୁ ଫୋନ୍ କରି ଡକାଇଲେ । ପ୍ରାୟ ୫୦ ଗ୍ରାମର ସୁନା ଅଳଙ୍କାର ନେଇ ବ୍ୟବସାୟୀ, ଗ୍ରାହକଙ୍କ ପାଖକୁ ଯିବା ପରେ ତାଙ୍କର ଆଉ କୌଣସି ଖବର ମିଳିନାହିଁ । ଏହାକୁ ନେଇ ପରିବାର ଲୋକେ ସୋର ଥାନାରେ ଅପହରଣ ଅଭିଯୋଗ କରିଛନ୍ତି ।
ସୋରର ସୁଭମ ଜୁଏଲାରୀ ମାଲିକଙ୍କ ସହିତ ଏପରି ଘଟଣା ଘଟିଛି । ଅଭିଯୋଗ ଅନୁସାରେ, ଗତକାଲି ଦାଣ୍ଡହରିପୁର ଅଂଚଳର ସୁମନ୍ତ ମଳିକ ନାମକ ଯୁବକ ଗହଣା କିଣିବା ପାଇଁ ଶୁଭମ ଜୁଏଲାରୀର ପ୍ରହଲ୍ଲାଦ ବେହେରାଙ୍କୁ ଫୋନ୍ କରି ଡକାଇଥିଲେ । ପ୍ରହଲ୍ଲାଦ ୫୦ ଗ୍ରାମର ସୁନା ଅଳଙ୍କାର ନେଇ ଦାଣ୍ଡହରିପୁର ଗାଁକୁ ଯିବା ପରଠାରୁ ତାଙ୍କର ପତ୍ତା ମିଳୁନି । ତାଙ୍କର ମୋବାଇଲ୍ ଫୋନ୍ ମଧ୍ୟ ସୁଇଚଅଫ୍ ଆସୁଛି । କିଛି ଦିନ ପୂର୍ବରୁ ସୋର ଅଂଚଳର ଜଣେ ଯୁବକକୁ କୋଲକାତାର ଚବିଶପ୍ରଗଣା ଅଂଚଳରେ ପଣବନ୍ଦୀ ରଖାଯାଇଥିବା ଖବର ଲୋକଙ୍କ ମନରୁ ଲିଭିନଥିବା ବେଳେ ଶୁଭମ ଜୁଏଲାରୀର ସୁନା ବ୍ୟବସାୟୀଙ୍କ ଏପରି ନିଖୋଜ ଖବର ଅଂଚଳରେ ଭୟ ଖେଳାଇ ଦେଇଛି ।