ଜଟଣୀ,୨୫/୦୨(ଜିଲ୍ଲା ଖବର) : ଜଟଣୀ ବ୍ଲକ ଅନ୍ତର୍ଗତ ଉପରବସ୍ତର ମୂଖ୍ୟ ରାସ୍ତା ମରଣଯନ୍ତା ପାଲଟିଯାଇଥିବା ନେଇ ଗ୍ରାମବାସୀମାନେ ସରକାରଙ୍କ ନିକଟରେ ଅଭିଯୋଗ କରିଥିଲେ । ତେବେ ଏନେଇ ସରକାରଙ୍କ ନିକଟରେ ବାରମ୍ବାର ଅଭିଯୋଗପରେ ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନା ମାଧ୍ୟମରେ ଠିକାଦାର ଚୟନକରି ରାସ୍ତା ନିର୍ମାଣଲାଗି କାର୍ଯ୍ୟାଦେଶ ମିଳିଥିଲା । କାର୍ଯ୍ୟାଦେଶ ପାଇବାର ୧୦ମାସ ମଧ୍ୟରେ କାର୍ଯ୍ୟସାରିବାକୁ ନିର୍ଦ୍ଧେଶ ରହିଥିବା ବେଳେ ବର୍ଷବର୍ଷ ବିତିଯାଇଥିଲେ ସୁଧା କାର୍ଯ୍ୟଶେଷ ହୋଇପାରୁ ନାହିଁ । ରାସ୍ତାରେ ବାଲି,ଚିପ୍ସ,ମେଂଟାଲ ଇତ୍ୟାଦି ପକାଇ ଠିକାଦାର କାମ ବନ୍ଦ କରିଦେବା ଫଳରେ ଲୋକମାନେ ଯାତାୟତରେ ନାହିଁ ନଥିବା ଅସୁବିଧାର ସମୁଖୀନ ହୋଇଛନ୍ତି । ତେବେ ଏନେଇ ଲୋକମାନଙ୍କ ଦ୍ୱାରା ଅଭିଯୋଗ ହେବାପରେ ସଂପୃକ୍ତ ଠିକାଦାର ଦିର୍ଘ ୮ମାସପରେ ଅଳ୍ପକିଛି ଅଂଶ କାମକରି ପୁଣି କିଛିଦିନ ହେଲା ଛୁ ମାରିଥିବା ଅଭିଯୋଗ ହୋଇଛି । ଜଟଣୀବ୍ଲକ ଅନ୍ତର୍ଗତ ପଦନପୁର ପଚାଂୟତ ଅଧିନସ୍ଥ ଉପରବସ୍ତ ଗ୍ରାମକୁ ସଂଯୋଗ ମୂଖ୍ୟରାସ୍ତା ଏବେ ମରଣଯନ୍ତା ପାଲଟିଛି । ଜଟଣୀବ୍ଲକଠାରୁ ଉପରବସ୍ତ ପର୍ଯ୍ୟନ୍ତ ୪କି:ମି ବାଟ ଗ୍ରାମବାସୀଙ୍କ ପାଇଁ ଅଭିଷାପ ପାଲଟିଯାଇଛି । ଏହି ରାସ୍ତାପାଇଁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକଯୋଜନା ମାଧ୍ୟମରେ ରାସ୍ତାର ନିର୍ମାଣକାର୍ଯ୍ୟ ଠିକାଦାରଙ୍କୁ ଦିଆଯାଇଥିବା ବେଳେ ଠିକାଦାର କାର୍ଯ୍ୟାରମ୍ଭ କରିବାଲାଗି ରାସ୍ତା ମଝିରେ ମେଂଟାଲ,ଚିପ୍ସ ପ୍ରଭୃତି ରାସ୍ତାରେ ଜମାଇଦେଇ ଏକବର୍ଷ ହେଲା କୁଆଡେ ଚମ୍ପଟ ମାରିଛନ୍ତି ବୋଲି ଗ୍ରାମବାସୀମାନେ ଅଭିଯୋଗ କରିଆସୁଛନ୍ତି । ନିର୍ମାଣର ୧୦ମାସ ମଧ୍ୟରେ କାମ ସାରିବାକୁ ଫଳକରେ ପ୍ରତିଶୃତି ଦେଇଥିବା ବେଳେ କାର୍ଯ୍ୟସରିବାର ଶେଷ ଅବଧୀ ଇତିମଧ୍ୟରେ ୯ମାସ ବିତିଯାଇଛି । ହେଲେ ରାସ୍ତାକାମ ସରିବା ପରିବର୍ତେ ଏବେ ମରଣଯନ୍ତା ପାଲଟିଗଲାଣି । କିନ୍ତୁ ସରକାରୀ କଳ ଏବଂ ଠିକାସଂସ୍ଥା ଏନେଇ ନିଦାବିଷ୍ଣୁ ସାଜିଛନ୍ତି ବୋଲି ଗ୍ରାମବାସୀମାନେ ମତପ୍ରକାଶ କରିଛନ୍ତି । ପ୍ରତିଦିନ ଛୋଟବଡ ଦୁର୍ଘଟଣାମାନ ଘଟୁଥିଲେ ମଧ୍ୟ ଗ୍ରାମବାସୀମାନେ ଭାଗ୍ୟକୁ ଆଦରି ପଡିରହିଛନ୍ତି ବୋଲି ଗ୍ରାମବାସୀମାନେ କ୍ଷୋଭପ୍ରକାଶ କରି କହିଛନ୍ତି । ଏହି ରାସ୍ତାଦେଇ ବିଦ୍ୟାଳୟକୁ ଯାଉଥିବା ଛାତ୍ରଛାତ୍ରୀ ଏବଂ କେନ୍ଦ୍ରୀୟ ଗବେଷଣା ପ୍ରତିଷ୍ଠାନ ନାଇଜରର ୨ନଂ ଫାଟକ ଦେଇ ଯାଉଥିବା ଲୋକମାନେ ମଧ୍ୟ ସମସ୍ୟାରେ ପଡିଥାନ୍ତି । ଲୋକମାନଙ୍କ ସମସ୍ୟାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ କରାଯାଇଥିବା ଏହି ରାସ୍ତା ଧୀରେଧୀରେ ଲୋକମାନଙ୍କ ପାଇଁ କାଳ ହୋଇଯାଇଥିଲା ବୋଲି ଗ୍ରାମବାସୀମାନେ କହିଛନ୍ତି । ବ୍ଲକଠାରୁ ଉପରବସ୍ତଗ୍ରାମ ପାଇଁ ୪କି:ମି ରାସ୍ତା ରହିଛି । ଏହି ରାସ୍ତାବର୍ଷାଦିନେ କାଦୁଅପଙ୍କରେ ମରଣଯନ୍ତା ପାଲଟିଯାଏ । ତେବେ ଏନେଇ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ଭାରତ ସରକାରଙ୍କ ଉନ୍ନୟନ ମନ୍ତ୍ରାଳୟ ଅନୁଦାନରେ ଠିକାଦାର ମାଧ୍ୟମରେ ୧୪୪.୩୧ ଲକ୍ଷଟଙ୍କା ବ୍ୟୟଅଟକଳ ହୋଇଥିଲା ବେଳେ ଏହାର ରକ୍ଷଣାବେକ୍ଷଣ ପାଇଁ ସରକାର ୫ବର୍ଷକୁ ୧୧.୫୪ଲକ୍ଷ ଟଙ୍କା ବ୍ୟୟବରାଦ କରିଛନ୍ତି । ଏହି ୪କି:ମି ରାସ୍ତାରେ ୩.୧୫୦କି:ମି ପିଚୁ ରାସ୍ତା ନିର୍ମାଣ ସହିତ ୦.୮୫୦ କି:ମି ପକ୍କା ରାସ୍ତା ରହିବ । ସେଥିରେ ୪ଟି ଶଙ୍ଖ ନିର୍ମାଣପାଇଁ ଚୁକ୍ତି ରହିଛି । ଠିକାଦାର ଏହି ରାସ୍ତାକାର୍ଯ୍ୟ ୨୦୧୯ ମସିହା ଅଗଷ୍ଟ ୧୯ ତାରିଖରେ ଆରମ୍ଭ କରି ୨୦୨୦ ମସିହା ମେ” ମାସ ୧୮ ତାରିଖରେ ସାରିବାକୁ ଲିଖିତ ପ୍ରତିଶୃତି ଦେଇଥିଲେ । ମାତ୍ର ଏହି ରାସ୍ତା ଆଜି ପର୍ଯ୍ୟନ୍ତ ସରିପାରିଲା ନାହିଁ । ଅଭିଯୋଗପରେ ପର୍ଯ୍ୟାୟକ୍ରମେ ଅଳ୍ପକିଛି କାମକରି ବାରମ୍ବାର ଠକୁଥିବା ଲୋକେ କହିଛନ୍ତି । ଏହି ରାସ୍ତାକାର୍ଯ୍ୟ ପାଇଁ ଠିକାଦାର ରାସ୍ତାରେ ଆଣି ବାଲି,ଗୋଡି,ମେଂଟାଲ ଇତ୍ୟାଦି ପକାଇ ରାସ୍ତାକଡରୁ ମାଟି କାଢିଦେଇଥିବା ଲୋକେ ଅଭିଯୋଗ କରିଥିଲେ । ରାସ୍ତାକାମ ମନ୍ଥରଗତିରେ କରିବା ସହିତ ବାହାରୁ ମାଟିଆଣି ରାସ୍ତାକଡ ଲେବଲିଂ କରିବା ପରିବର୍ତେ ରାସ୍ତାକଡରୁ ମାଟିକାଢି ଖାଲ କରିପକାିଇଥିଲେ । ଫଳରେ ଅସରାଏ ବର୍ଷାରେ ଉକ୍ତଖାଲରେ ମାଟିଧସି ଖାଲଖମା ସୃଷ୍ଟି ହୋଇଯାଇଥିଲା । ଚୁକ୍ତି ଅନୁସାରେ ପିଚୁ ରାସ୍ତାର ଉଭୟ ପାଶ୍ୱର୍ରେ ମାଟି ଫିଲିଙ୍ଗ କରିବା କଥା । କିନ୍ତୁ ମାଟି ରାସ୍ତାକଡରୁ କାଢି ରାସ୍ତା ଉଚ୍ଚା କରାଯାଇଛି । ମାଟି କାମପାଇଁ ୭୨୯୦.୦୪ଘ.ମି ତଥା ୧୨୦୫ ଟ୍ରକ ମାଟି ପକାଇବାକୁ ଲିଖିତ ଚୁକ୍ତି କରିଛନ୍ତି । ତେବେ ଏନେଇ ଠିକାଦାର ଏବଂ ଯନ୍ତ୍ରୀଙ୍କୁ ଗ୍ରାମବାସୀମାନେ ଅଭିଯୋଗ କରିଥିଲେ ହେଁ କେହି କିଛି ଶୁଣିବାକୁ ନାରାଜ ହୋଇଥିଲେ । ଅନ୍ୟ ପକ୍ଷରେ ରାସ୍ତାମଝିରେ ଜମିରହିଥିବା ବାଲି,ଗୋଡି ଉପରେ ଟ୍ରାକ୍ଟର, ଟ୍ରକ ଯାଇ ରାସ୍ତାସାରା ବାଲିଗୋଡି ଜମିରହି ଯାତାୟତରେ ସମସ୍ୟା ସୃଷ୍ଟି ହୋଇଥିଲା । ମାତ୍ର କାର୍ଯ୍ୟାରମ୍ଭର ୮ମାସ ତଥା ୨୦୨୦ ମାର୍ଚ୍ଚମାସଠାରୁ ମହାମାରୀ କରୋନା ସଂକ୍ରମଣ ଯୋଗୁଁ ସରକାରଙ୍କ ପକ୍ଷରୁ ସମସ୍ତ କାର୍ଯ୍ୟରେ ଅଙ୍କୁଶ ଲାଗିଯାଇଥିଲା । ଅନ୍ୟ ପକ୍ଷରେ ଏହି ରାସ୍ତାକାମ ପରବର୍ତି ସମୟରେ ଜଟଣୀର ହରିଭାଇନା ଛକ-ତଳଖେତା ମୂଖ୍ୟରାସ୍ତାର କାମ ଆରମ୍ଭ ହୋଇଥିଲା ବେଳେ କରୋନା ସମୟରେ ବନ୍ଦ ରହିଥିଲା । ଏବେ ଏହି ରାସ୍ତାକାମ ସରିବାର ୪ମାସ ବିତିଯାଇଥିଲେ ମଧ୍ୟ ଉପରବସ୍ତ ରାସ୍ତାର ନିର୍ମାଣ କାର୍ଯ୍ୟାରମ୍ଭ ହୋଇପାରିନାହିଁ । ଫଳରେ ଲୋକମାନଙ୍କ ମଧ୍ୟରେ ସରକାରୀ କଳ ଏବଂ ଠିକାଦାରଙ୍କ ପ୍ରତି ଅହିଷ୍ଣୁତା ବଢିବାରେ ଲାଗିଛି । ସ୍ଥାନୀୟ ଲୋକେ ଠିକାଦାରଙ୍କୁ ଯୋଗାଯୋଗ କରିବାକୁ ଚେଷ୍ଟା କରୁଥିଲେ ମଧ୍ୟ ଯୋଗାଯୋଗ ହୋଇପାରୁ ନାହିଁ ବୋଲି କହିଛନ୍ତି । ତେଣୁ ଏଥିପ୍ରତି ବିଭାଗୀୟ ଅଧିକାରୀ ଦୃଷ୍ଟିଦେଇ ତୁରନ୍ତ କାର୍ଯ୍ୟ ସାରିବାକୁ ଗ୍ରାମବାସୀମାନେ ଦାବି କରିଛନ୍ତି ।
ରୀପୋର୍ଟ,ସଞ୍ଜୀବ କୁମାର
