
ଜଟଣୀ,(ସଞ୍ଜୀବ କୁମାର):ଖୋର୍ଦ୍ଧା ଜିଲ୍ଲା ଜଟଣୀ ବ୍ଲକରେ ଦିନକୁ ଦିନ କର୍ମଚାରୀ ମରୁଡି ହୋଇଥିବା ଦେଖାଦେଉଛି । ଫଳରେ ଜଟଣୀ ବାସିଙ୍କ କାର୍ଯ୍ୟରେ ଅବହେଳା ହେଉଛି । ଯେଉଁ ଲୋକ କାମରେ ଯାଉଛନ୍ତି ସେମାନଙ୍କର କୈାଣସି କାମ ହୋଇପାରୁନାହିଁ ବୋଲି କେତେକ ବ୍ୟକ୍ତି ଅଭିଯୋଗ କରିଛନ୍ତି । ମହାମାରୀ କରୋନା ଯୋଗୁଁ ରାଜ୍ୟ ସରକାରଙ୍କ ତରଫରୁ ବିଭିନ୍ନ କାର୍ଯ୍ୟାଳୟ ଠାରୁ ଆରମ୍ଭ କରି ଜନସାଧାରଣଙ୍କ ପାଇଁ ବିଭିନ୍ନ କଟକଣା ଜାରିରହିଛି ।
ଅଳ୍ପ ସଂଖ୍ୟକ କର୍ମଚାରୀଙ୍କୁ ନେଇ କାର୍ଯ୍ୟାଳୟରେ କାର୍ଯ୍ୟ ତୁଲାଇବାକୁ ନିର୍ଦ୍ଦେଶ ରହିଥିବା ବେଳେ ଜରୁରୀ କାର୍ଯ୍ୟ ନଥିଲେ କୌଣସି କାର୍ଯ୍ୟାଳୟକୁ ଆସନ୍ତୁ ନାହିଁ ବୋଲି କୁହାଯାଇଛି । କିନ୍ତୁ ଏହି ସମୟରେ ଜଟଣୀ ବ୍ଲକରେ କେତେକ କର୍ମଚାରୀଙ୍କ ଅନ୍ୟତ୍ର ବଦଳି ହୋଇଥିବାରୁ ବ୍ଲକ କାର୍ଯ୍ୟାଳୟର କାର୍ଯ୍ୟରେ ବାଧା ସୃଷ୍ଟି ହେଉଛି ।
ଏପରିକି ଜଣେ ଜଣେ କର୍ମଚାରୀଙ୍କୁ ଦୁଇଦୁଇଟି ସ୍ଥାନ ସମ୍ଭାଳିବାକୁ ପଡ଼ୁଛି । ଅନ୍ୟ ପକ୍ଷରେ ଦେଖିବାକୁ ଗଲେ ଜଟଣୀ ବ୍ଲକରେ ପୋଷ୍ଟିଙ୍ଗ୍ ହୋଇଥିବା କର୍ମଚାରୀ ଖୋର୍ଦ୍ଧା ଜିଲ୍ଲା କାର୍ଯ୍ୟାଳୟରେ କାର୍ଯ୍ୟକରି ବ୍ଲକରୁ ଦରମା ନେଉଛନ୍ତି । ତେଣୁ ଆଜକୁ ଦୀର୍ଘଦିନ ହେବ ଜଟଣୀ ବ୍ଲକରେ କର୍ମଚାରୀ ଅଭାବ ଦିନକୁ ଦିନ ବୃଦ୍ଧି ପାଉଛି ।
ବ୍ଲକ ର ଏକ ବିଶେଷ ସୂତ୍ରରୁ ଜଣାପଡ଼ିଥିବା ଖବର ଅନୁଯାୟୀ ଏହି ବ୍ଲକରେ ଥିବା କୋପରେଟିଭ ଏକ୍ସଟେନସନ ଅଫିସର(ସି.ଇ.ଓ.) ରାମାନାରାୟଣ ମଲ୍ଲିକ ଚଳିତବର୍ଷ ଜାନୁଆରୀ ମାସରୁ ବଦଳି ହୋଇଥିଲେ ମଧ୍ୟ ଏହି ପଦବି ଆଜି ପର୍ଯ୍ୟନ୍ତ ଖାଲି ପଡିଛିି । ସେହିପରି ବ୍ଲକ ସାମାଜିକ ସୁରକ୍ଷା ଅଧିକାରୀ(ବ଼ିଏସ୍ଏସ୍ଓ) ଦାୟିତ୍ୱରେ ଥିବା ବିଜୟ କର ୨୦୨୦ ଫେବୃୟାରୀ ୨୦ ତାରିଖରୁ କାର୍ଯ୍ୟରୁ ଅବସର ନେଇଥିଲେ ମଧ୍ୟ ତାଙ୍କ ସ୍ଥାନଟି ଖାଲିପଡ଼ିଛି ।
ଏହି ବ୍ଲକରେ ଖାଲିଥିବା ଗ୍ରାମ ପଚାଂୟତ ସଂପ୍ରସାରଣ ଅଧିକାରୀ(ଜିପିଇଓ) ଅପରାଜିତା ସ୍ୱାଇଁ, ଏବିଡ଼ିଓ ଭାବରେ ପଦୋନ୍ନତି ପାଇଥିବାରୁ ଜିପିଓ ସ୍ଥାନଟି ମଧ୍ୟ ଖାଲି ପଡ଼ିଛି । ବ୍ଲକ ପ୍ରଗତି ସହାୟକ ( ବିପିଏ) ଦାୟିତ୍ୱରେ ଥିବା କେଳୁଚରଣ ସେଠି ବେଗୁନିଆ ବ୍ଳକକୁ ବଦଳି ହୋଇଛନ୍ତି । କ୍ୟାସିୟର କୃଷ୍ଣଚନ୍ଦ୍ର ସେଠି ଏହି ବ୍ଲକରୁ ବଦଳି ହୋଇ ଖୋର୍ଦ୍ଧା ତହସିଲରେ ଯୋଗ ଦେଇଛନ୍ତି । ମାତ୍ର ଏହି ସବୁ ପଦବି ଖାଲି ପଡିବାରୁ ଲୋକମାନଙ୍କର କାର୍ଯ୍ୟରେ ଅବହେଳା ହେଉଛି ।
ସେହିପରି ଉକ୍ତ ବ୍ଲକରେ ଆସିଷ୍ଟାଂଟ ଏକ୍ସ୍ୟୁଟିଭ ଇଞ୍ଜିନିୟର ଦାୟିତ୍ୱ ତୁଲାଉଥିବା ବିନୋଦ ମହାପାତ୍ର ମଧ୍ୟ ଏଠାରୁ ବଦଳି ହୋଇ ଯାଇଥିଲେ ମଧ୍ୟ ଏମାନଙ୍କ ସ୍ଥାନରେ କୌଣସି ଜଣେ ହେଲେ କର୍ମଚାରୀ ଯୋଗ ଦେଇନାହାଁନ୍ତି । ତେଣୁ ଏଠାରେ ସିନିୟର କ୍ଲର୍କ ୩ଜଣଙ୍କ ଆବଶ୍ୟକ ସ୍ଥଳେ ୨ ଜଣଙ୍କୁ ନିୟୋଜିତ କରାଯାଇଥିଲା । ଏଥି ମଧ୍ୟରୁ ଜଣେ କିରାଣୀଙ୍କ ବଦଳି ହେବାପରେ ଅନ୍ୟ ଜଣେ କର୍ମଚାରୀ ଖୋର୍ଦ୍ଧାଜିଲାପାଳଙ୍କ କାର୍ଯ୍ୟାଳୟରେ କାମ କରି ବ୍ଲକରୁ ଦରମା ପାଉଛନ୍ତିି । କର୍ମଚାରୀ ମରୁଡି ହୋଇ ଲୋକମାନଙ୍କ ପାଇଁ ସମସ୍ୟା ସୃଷ୍ଟି ହେଉଛି ।
ବିିଭିନ୍ନ ପଞ୍ଚାୟତରୁ ବିଭିନ୍ନ କାର୍ଯ୍ୟପାଇଁ ଆସୁଥିବା ଜନସାଧାରଣ ସମସ୍ୟାର ସମ୍ମୁଖୀନ ହେଉଛନ୍ତି । ଜଣେ ଜଣେ କର୍ମଚାରୀଙ୍କୁ ବ୍ଲକ ତରଫରୁ ୨୩ଟି କାର୍ଯ୍ୟଭାର ଲଦି ଦିଆଯାଉଥିବା କର୍ମଚାରୀ ଜଣକ ଅଣନିଶ୍ୱାସୀ ହୋଇ ପଡ଼ୁଛି । ସେମାନଙ୍କର କାର୍ଯ୍ୟ କରିବାର ସ୍ପୃହା ରହୁନାହିଁ । ଜିଲ୍ଲା କାର୍ଯ୍ୟାଳୟରେ ବହୁ ସଂଖ୍ୟକ କର୍ମଚାରୀ ଥିବା ବେଳେ ଜଟଣୀ ବ୍ଲକରୁ କର୍ମଚାରୀ ଯାଇ ଜିଲ୍ଲା କାର୍ଯ୍ୟାଳୟରେ କାର୍ଯ୍ୟ ତୁଲାଉଥିବା ସାଧାରଣରେ ପ୍ରଶ୍ନ ସୃଷ୍ଟି ହେଉଛି ।
ବିଭିନ୍ନ ସରକାରୀ ଓ ଜନସାଧାରଣଙ୍କ କାର୍ଯ୍ୟରେ ବ୍ୟାଘାତ ସୃଷ୍ଟି ହେଉଛି । ଯେଉଁ ଯେଉଁ କର୍ମଚାରୀ ଜଟଣୀ ବ୍ଲକରୁ ବଦଳି ହୋଇଛନ୍ତି ତାଙ୍କ ସ୍ଥାନମାନଙ୍କରେ ଜଣେ ହେଲେ ନୂତନ କର୍ମଚାରୀ ବ୍ଲକରେ ଯୋଗଦାନ କରିନଥିବାରୁ ଦିନକ ଦିନ ସମସ୍ୟା ବୃଦ୍ଧି ପାଉଛି । ଫଳରେ ଲୋକମାନଙ୍କର ଭତା, ସ୍ୱଳ୍ପଋଣ ଓ ସ୍ୱୟଂ ସହାୟକ ଗୋଷ୍ଠି ପ୍ରଭୃତିଙ୍କ କାର୍ଯ୍ୟରେ ବ୍ୟାହତ ହେଉଥିବା କେତେକ ବ୍ୟକ୍ତି ଅଭିଯୋଗ ଆଣିଛନ୍ତି ।
ଅନ୍ୟ ପକ୍ଷରେ ଜଟଣୀ ବ୍ଲକ ପରିସରରେ ପୁର୍ବରୁ କାର୍ଯ୍ୟ କରୁଥିବା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ଜାଂଆଳାର ଏକ ବିଦ୍ୟାଳୟ ପରିସରରେ ଚାଲୁଛି । ଏହିପରି ଅନେକ କାର୍ଯ୍ୟାଳୟ ଜଟଣୀ ବ୍ଲକ ମଧ୍ୟରୁ ଯାଇ ଅନ୍ୟତ୍ର କାର୍ଯ୍ୟାଳୟ ଚାଲିଛି । ଫଳରେ ଜଟଣୀ ବ୍ଲକକୁ ଆସୁଥିବା ଲୋକେ ଶିକ୍ଷାଜନିତ କାର୍ଯ୍ୟ ପାଇଁ ଏଠାରୁ ୫ କିମି ଦୁର ଜାଂଆଳା ଅଂଚଳକୁ ଯାଉଛନ୍ତି ।
ତେଣୁ ପଞ୍ଚାୟତ ରାଜ ବିଭାଗର ବରିଷ୍ଠ ଅଧିକାରୀଙ୍କ ସମେତ ଖୋର୍ଦ୍ଧା ଜିଲ୍ଲାପାଳ ତୁରନ୍ତ ଦୃଷ୍ଟି ନିକ୍ଷେପକରି ଜଟଣୀ ବ୍ଲକ କର୍ମଚାରୀ ଅଭାବ ପ୍ରତି ଦୃଷ୍ଟି ଦେଲେ ଜନସାଧାରଣ ଲୋକେ ସୁଫଳ ପାଇବେ ବୋଲି ସାଧାରଣରେ ଦାବୀ ହେଉଛି ।







